АҚШ президенти Дональд Трамп 10 август куни ҳар қандай тинчлик музокаралари доирасида Эрондан товон пули талаб қилишини айтди. У бунга Теҳрон томонидан қўллаб-қувватланган ёки амалга оширилган кўп йиллик ҳужумларни сабаб қилиб кўрсатди. Бу ҳақда Al Arabiya хабар берди.
“Эрон сўнгги беш ойлик ҳарбий низолар давомида ўзига етказилган зарар учун товон талаб қилмоқда… Мен ҳам Эрондан улар турли урушларда ўлдирган ҳамда оғир яралаган барча одамлар учун товон пули талаб қиламан”, деб ёзди Трамп ўзининг Truth Social’даги саҳифасида.
Ўтган ҳафтада Трамп Эронга жуда қаттиқ зарба бериш билан, жумладан, фуқаролик инфратузилмасига ҳужум қилиш билан таҳдид қилган эди. Кейин эса у фикридан қайтиб, тинчлик битими яқинлигига шама қилди.
Axios нашри хабарига кўра, АҚШ президенти Эроннинг Ҳормуз бўғозини очиш бўйича келишувни пайсалга солаётганидан норозилик билдирмаган. Айни пайтда, Теҳрон АҚШдан биринчи бўлиб Эрон портлари қамалини тугатишни ва нефть саноатига қўйилган санкцияларни олиб ташлашни талаб қилмоқда.
Трамп 10 август куни кечроқ Америка ҳарбийлари бутун бўғозни миналардан тозалаётганини ва АҚШ сув йўлини тўлиқ назорат қилаётганини айтди. Музокаралар тўхтаб қолгани сабабли Эрон томонидан бўғознинг тўсилиши ёнилғи нархининг кескин ошишига ва жаҳон иқтисодиётида хавотирларга олиб келди. Бу ҳолат ноябрь ойидаги оралиқ сайловлар олдидан Трампга босим ўтказмоқда.
Трамп Эрондан компенсация талаб қилар экан, 2000 йилда USS Cоle ҳарбий кемасининг портлатилишини эслаб ўтди. Шунингдек, у товон пули “Эрон сўнгги 50 йил давомида ўлдирган юз минглаб айбсиз намойишчиларнинг оилаларига ҳам тўланиши кераклигини” қўшимча қилди.
“Мен ўз вакилларимга ушбу талабни келажакдаги барча музокараларга қатъий киритиш бўйича топшириқ бердим”, деди у.
