Хитой Шинжон-Уйғур автоном районида жойлашган ва 1964 йилда Хитойнинг биринчи атом бомбаси синаб кўрилган асосий ядровий синов полигонини тез суръатлар билан кенгайтирмоқда ва модернизация қилмоқда. Бу ҳақда янги сунъий йўлдош тасвирлари ва халқаро экспертлар таҳлилига таяниб, “The Washington Post” хабар берди.
Нашр маълумотларига кўра, Лобнор туманидаги полигонда янги туннеллар, йўллар қурилган, чуқур қудуқлар қазилган, энергетик ва ёрдамчи иншоотлар барпо этилган. У ерда янги ерости ядровий синовларига тайёргарлик кетaётганини кўриш мумкин.
Экспертларнинг айтишича, фаол қурилиш ишлари 2021 йилдаёқ бошланган, 2024-2025 йилларда эса модернизация узлуксиз давом этмоқда.
“Охирги беш йилда инфратузилма сезиларли равишда кенгайди, синовлар ўтказиш имкониятлари эса анча ошди”, дейди AllSource Analysis эксперти Ренни Бэбьярц.
Таҳлилчиларнинг фикрича, Хитой ядровий синовлар бўйича тажриба ҳажмида АҚШ ва Россиядан жиддий ортда қолмоқда.
“Хитой ядровий давлатлар орасида энг кам синов ўтказган мамлакат ҳисобланади ва қурол хусусиятларини яхшилаш учун янги серия синовлар керак бўлиши мумкин”, дейди Карнеги фонди эксперти Тун Чжао.
Синовлар, шунингдек, Тайвань атрофида юзага келиш эҳтимоли бўлган можаро шароитида АҚШни ўзини тутиб туриш стратегиясининг бир қисми сифатида ҳам кўрилади.
Шу билан бирга, Хитой фаоллигининг кучайиши АҚШ ва Россия ўртасидаги кескинлик фонида юз бермоқда.
Бунгача Россия Президенти Владимир Путин “Посейдон” ва “Буревестник” каби янги ядровий тизимларни намойиш қилганди. АҚШ Президенти Дональд Трамп эса Пентагонга синовларни қайта бошлашга тайёргарлик кўришни буюрди. АҚШ махфий ядровий ракета – AGM-181 ни намойиш қилди.
Стокгольм тинчлик тадқиқотлари институтининг прогнозларига кўра, 2030 йилга бориб Хитой ўз арсеналини 1000 тага етказиши мумкин.
