Англиянинг “Тоттенҳэм” клуби бош мураббий Томас Франк билан хайрлашди. Бу ҳақда клуб матбуот хизмати хабар берди.
“Клуб бош мураббий лавозимида ўзгариш қилишга қарор қилди ва Томас Франк бугундан бошлаб ўз лавозимини тарк этади. Томас 2025 йил июнь ойида тайинланган эди. Биз унга келажакни биргаликда қуриш учун зарур вақт бериш ва қўллаб-қувватлашга ҳаракат қилдик. Бироқ натижалар ва ўйин сифати Кузатув кенгашини мавсумнинг айни босқичида ўзгариш зарур, деган хулосага келишга мажбур қилди. Биз Томасга клуб ривожи йўлидаги саъй-ҳаракатлари учун миннатдорчилик билдирамиз ва келгуси фаолиятида муваффақиятлар тилаймиз”, дейилади хабарда.
Маълум қилинишича, клуб Томас Франк ўрнига янги мураббий топиш учун бир нечта муқобил вариантларни кўриб чиқмоқда. 52 ёшли даниялик мутахассис жамоани 2025 йил июнь ойида қабул қилиб олган эди.
“Тоттенҳэм”нинг Англия Премьер Лигасидаги ғалабасиз серияси саккизта ўйинга етди. Жамоа турнир жадвалида 16-ўринни эгаллаб турибди. Лондонликлар 26 турдан сўнг 29 очко жамғарган.
Чемпионлар Лигасининг умумий босқичида “Тоттенҳэм” саккизта ўйинда 17 очко тўплаб, тўртинчи ўринни эгаллади ва тўғридан тўғри 1/8 финал босқичига йўл олди.
