Мисрга кириш визаси нархи, жумладан ўзбекистонлик сайёҳлар учун ҳам 1 мартдан бошлаб оширилади. Бу ҳақда мамлакат Туристик компаниялар ва агентликлар палатаси ҳужжатига таяниб, Cаirо 24 хабар берди.
Визалар нархи 25 доллардан 30 долларгача кўтарилади. Ушбу чора сайёҳларга кўрсатилаётган хизматлар сифатини ва Миср сайёҳлик йўналишининг рақобатбардошлигини оширишга қаратилган.
Ўзгариш фақат Қоҳира ва Хургада аэропортлари орқали келадиган сайёҳларга таъсир қилади. Шарм аш-Шайх меҳмонлари учун 15 кунлик бепул “Синай муҳри” сақланиб қолади. Аммо ҳудуддан ташқарига чиқишда виза учун тўлов қилиш керак бўлади.
Кузда Миср ҳукумати кириш визалари нархини 45 долларгача кўтармоқчи эди. Ушбу қонун лойиҳаси парламент томонидан маъқулланди, аммо охир-оқибат амалга оширилмади. Миср охирги марта виза нархларини 2014 йил май ойида оширган эди.
Ўшанда 30 кунгача бўлган бир марталик рухсатномалар нархи 15 доллардан 25 долларгача кўтарилган. 2017 йилда эса олти ой амал қиладиган кўп марталик виза нархи 35 доллардан 60 долларга оширилган. Мамлакатда, шунингдек, 700 доллар турадиган беш йиллик кўп марталик виза ҳам мавжуд.
Маълумот учун, 2026 йилнинг илк ойида Ўзбекистон фуқаролари энг кўп сафар қилган Топ-10 давлатлар қаторига Миср ҳам киради. Жумладан, бу мамлакатга 4 585 нафар ўзбекистонлик сайёҳ ташриф буюрган.
