Мадриднинг “Реал” клуби ҳужумчиси Винисиус Жуниор фаолиятини Саудия Арабистони Пролигасида давом эттириши мумкин. Indykaila News хабарига кўра, ўтган дам олиш кунлари Саудия Арабистонининг номи ошкор этилмаган клуби “Реал” раҳбарияти билан боғланиб, бразилиялик футболчини 230 миллион еврога сотиб олиш таклифини билдирган.
Манбада қайд этилишича, “қироллик клуби” мазкур таклифга аниқ муносабат билдириб, Винисиус жорий қишки трансфер ойнасида сотилмаслигини маълум қилган.
Эслатиб ўтамиз, аввалроқ оммавий ахборот воситаларида Винисиус 2026-йилнинг ёзида “қироллик клуби”ни тарк этиши мумкинлиги ҳақида хабарлар тарқалган эди. Унга кўра, футболчи клуб билан янги битим имзолашни истамаяпти. Мазкур ҳолат ортидан бир қанча клублар, жумладан “Челси” футболчига жиддий қизиқиш билдирмоқда.
Маълумот учун, жорий мавсум 25 ёшли бразилиялик ҳужумчи барча мусобақалар доирасида жами 29 та учрашувда майдонга тушиб, ўз ҳисобига 6 та гол ва 8 та голли узатма муаллифига айланган. Винисиуснинг “Реал” билан амалдаги меҳнат шартномаси 2027-йилнинг ўрталарига қадар мўлжалланган.
