Ироқ шимолида амалга оширилган дорн ҳужуми оқибатида бир нафар Франция аскари ҳалок бўлди, яна олти нафари жароҳатланди. Франция президенти Эммануэл Макрон ушбу ҳужумни қабул қилиб бўлмас ва асоссиз деб атади. Бу ҳақда France 24 хабар берди.
Ҳарбийлар Ироқда ИШИДга қарши курашаётган халқаро коалиция таркибида антитеррор тайёргарлик машғулотларини ўтказаётган эди. Ҳужум 12 март куни, минтақадаги Италия ҳарбий базасига қилинган зарбадан бир неча соат ўтиб содир этилган. Ҳалок бўлган офицернинг исми Арно Фрион экани маълум қилинди.
“2015 йилдан буён ИШИДга қарши курашаётган кучларимизга нисбатан қилинган бу ҳужумни қабул қилиб бўлмайди. Уларнинг Ироқдаги мавжудлиги терроризмга қарши кураш доирасидадир. Эрондаги уруш бундай ҳужумларни оқлай олмайди”, деб ёзди Макрон X ижтимоий тармоғидаги саҳифасида.
Мазкур воқеа АҚШ ва Исроилнинг Эронга қарши ҳаво ҳужумлари бошланганидан 13 кун ўтиб, минтақада кескинлик кучайиб бораётган бир вақтга тўғри келди. Маълумотларга кўра, Ироқдаги шиа жангарилари сўнгги бир неча кун ичида АҚШ манфаатларига қарши дрон ва ракета ҳужумларини сезиларли даражада оширган.
Ҳужум учун масъулиятни “Ашоб ал-Каҳф” гуруҳи ўз зиммасига олди. Гуруҳ баёнотида айтилишича, бу Франция Яқин Шарққа ўзининг ҳарбий кемалариниюборганига жавобдир ва Франциянинг ҳудуддаги объектлари қонуний нишон ҳисобланади.
Ҳозирда Франциянинг Яқин Шарқ минтақасида (Жибути, БАА, Иордания, Ироқ ва Ливан каби давлатларда) 4000 нафарга яқин ҳарбий хизматчиси бор. Шунингдек, мамлакат Ўрта ер денгизи, Қизил денгиз ва Ҳормуз бўғози йўналишида ўзининг авиаташувчи зарбдор гуруҳи бошчилигида ўндан ортиқ ҳарбий кемаларини сафарбар этган.
Жума, 13 март куни Франция ҳукумати мудофаа бўйича вазирлар маҳкамаси йиғилишини ўтказади. Унда юзага келган вазият ва ҳужумга муносиб жавоб қайтариш масаласи муҳокама қилиниши кутилмоқда.
Шу билан бирга, Италия мудофаа вазирлиги ҳам Ироқ Курдистонидаги НАТО ходимлари жойлашган Италия ҳарбий базасига қилинган тунги ҳужумни қасддан амалга оширилган деб баҳолади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
