Сурхондарё ва Андижон вилоятларида ҳудудий электр тармоқлари корхоналарининг масъул шахслари томонидан амалга оширилган коррупцион ҳолатлар аниқланди. Бу ҳақда Давлат хавфсизлик хизмати хабар берди.
Маълум қилинишича, “Ҳудудий электр тармоқлари” АЖ “Энергосавдо” филиали Шўрчи туман бўлими муҳандиси хизмат мавқеини суиистеъмол қилиб, фуқарога тегишли савдо дўконида электр энергиясидан фойдаланиш бўйича аниқланган қоидабузарлик ҳолати юзасидан тузилган далолатномани қонуний тартибда кўриб чиқмаслик, ишни судга юбормаслик ҳамда янги электр ҳисоблагич ўрнатиб, рўйхатдан ўтказиб бериш эвазига 1000 АҚШ доллари талаб қилган. Муҳандис дастлаб 200 АҚШ доллари ва 1 млн 50 минг сўм олган. ДХХнинг Сурхондарё вилояти бўйича бошқармаси ва бошқа ҳуқуқни муҳофаза этувчи ташкилотлар билан ҳамкорликда ўтказилган тезкор тадбирда у қолган 500 АҚШ доллари ва 2,4 млн сўмни олган вақтида ушланган.
Бундан ташқари, Андижон вилоятида кузатилган ҳолатда Балиқчи туман электр таъминоти корхонаси бошлиғи ўринбосари ўз хизмат мавқеидан фойдаланиб, туман ЭТК ходимларининг фаолият кўрсаткичларини баҳолайдиган ойлик ҳисоботларини “Ҳудудий электр тармоқлари” АЖ Андижон ҳудудий филиалидаги танишлари орқали ижобий ҳал этиб бериш эвазига пул талаб қилган. Ўтказилган тезкор тадбирда мансабдор шахс ЭТК ходимлари томонидан йиғиб берилган 300 АҚШ долларини олган вақтида ашёвий далиллар билан қўлга олинган.
Билдирилишича, ҳозирда қонунбузарларга нисбатан жиноят ишлари қўзғатилиб, тергов ҳаракатлари олиб борилмоқда.
