Бугун, 18 июнга ўтар кечаси Москва ва Москва вилояти яна учувчисиз учиш аппаратлари билан оммавий ҳужумга учради. Бу ҳақда “Incidentia” хабар берди.
Россия томонининг маълум қилишича, ҳаво ҳужумидан мудофаа тизимлари пойтахтга яқинлашган 30 дан ортиқ дронни уриб туширган.
Қайд этилишича, асосий зарба 16 июнь куни Москва нефтьни қайта ишлаш заводига берилган. Украина махсус хизматлари томонидан амалга оширилган операцияда FP-1, “Лютий” ва бошқа турдаги дронлар қўллангани айтилмоқда.
Хабарга кўра, дронлар заводдаги нефтьни бирламчи қайта ишлаш қурилмасини нишонга олган. “Reuters” агентлиги келтирган маълумотларга кўра, шикастланган мажмуа корхона қувватининг қарийб 53 фоизини таъминлаб келган. Шу сабабли завод фаолияти вақтинча тўхтатилгани билдирилмоқда.
Москва шаҳри мэри Сергей Собянин ҳужум фактини тасдиқлаб, дронлардан бири нефтьни қайта ишлаш заводи ҳудудидаги объектга шикаст етказганини маълум қилган. Унинг айтишича, ҳодиса оқибатида жабрланганлар йўқ.
18 июнь куниги янги ҳужум давомида уриб туширилган дронлардан бирининг бўлаклари Москвадаги “Садовод” савдо маркази ҳудудига тушган ва бинога енгил зарар етказган. Бу сафар Капотня туманидаги нефть заводига тўғридан-тўғри янги зарба берилгани ҳақида маълумот келтирилмаган.
