Тошкент вилоятининг Қибрай, Тошкент, Зангиота ва Юқори Чирчиқ туманларида жойлашган сунъий иситиш тизимига эга айрим иссиқхоналарни демонтаж қилиш ҳамда уларни иситиш тармоқларидан узиш ишлари бошланди.
Маълум қилинишича, махсус комиссия томонидан ўтказилган текширувларда куз-қиш мавсумида қатор иссиқхоналарда кўмир, мазут, автомобил шиналари ва бошқа зарарли ёқилғилардан фойдаланилгани аниқланган. Бу эса атмосфера ҳавосига зарарли моддаларнинг меъёрдан ортиқ чиқишига сабаб бўлиб, атроф-муҳит ва аҳоли саломатлигига салбий таъсир кўрсатган.
Шу муносабат билан Президентнинг 2026 йил 25 мартдаги 108-сон қарори ҳамда Вазирлар Маҳкамасининг 2026 йил 9 апрелдаги 162-сон қарори асосида иссиқхоналарни сунъий иситиш тизимларидан узиш ишлари бошланган.
Ҳукумат қарорига мувофиқ, фаолиятини тўхтатиб, Сурхондарё вилоятининг Шеробод туманидаги «Surxon-Agro» эркин иқтисодий зонасига кўчадиган тадбиркорлар учун қатор имтиёзлар белгиланган.
Жумладан, иссиқхона хўжаликлари учун олинган кредитларни қайтариш муддати 5 йилгача узайтирилади, шунингдек 3 йилгача имтиёзли давр берилади. Илгари ажратилган давлат кафолатлари ва фоиз харажатларини қоплаш бўйича компенсациялар ҳам сақлаб қолинади.
Бундан ташқари, 2028 йил 1 апрелга қадар «Surxon-Agro» ҳудудига кўчириладиган иссиқхоналарни демонтаж қилиш, ташиш ва қайта ўрнатиш харажатлари ер майдонининг ҳар бир сотихи учун 500 минг сўмгача миқдорда бир марталик тартибда қоплаб берилади.
Айни пайтда Тошкент вилояти тадбиркорларига янги ҳудудга кўчиш шартлари, тақдим этиладиган имтиёзлар ва бошқа ташкилий масалалар бўйича тушунтириш ишлари олиб борилмоқда. Шундан кейин иссиқхоналар сунъий иситиш тизимларидан узилиб, тегишли шартномалар бекор қилинади.
