Америка Қўшма Штатлари ўзининг ядровий кучларини модернизация қилади ва бошқа давлатлар билан тенг ҳуқуқли асосда ядровий синовларни ўтказади.
Бу ҳақида Пентагон раҳбари Пит Хегсет Роналд Рейган жамғармаси томонидан Калифорнияда ташкил этилган форумда сўзлаган нутқида маълум қилди.
“Президент Дональд Трамп аввал таъкидлаганидек, биз ядровий кучларимизни модернизация қилмоқдамиз. Биз ядровий қурол синовларини бошқа давлатлар билан тенг ҳуқуқли асосда ўтказамиз”, деди у.
Хегсет Қўшма Штатлар Хитой билан ҳарбий қарама-қаршиликни истамаслигини таъкидлади.
“Трамп бошчилигидаги Уруш вазирлиги соғлом ақлга асосланади. Бундай ёндашув Хитойни қарама-қаршилик билан эмас, балки куч билан тийиб туришни назарда тутади”, деб таъкидлади Хегсет.
Аввалроқ Пит Хегсет тижорий алоқа иловаси – Signal’да Яманга қарши режалаштирилган ҳарбий зарба ҳақидаги маълумотларни ошкор этиб юборганди. Пентагон бош инспектори Хегсетнинг ҳаракатлари устидан текширув олиб борди ва Қўшма Штатлар қўшинлари хавф остида қолган, деб хулоса берди.
Махфий текширув ҳисоботини ўқиган манбаларга кўра, инспектор Хегсетнинг Сигнал иловасидаги чатга киритган маълумотлари АҚШ Марказий қўмондонлиги томонидан махфий деб таснифланганини аниқлаган. Маълумотнинг ўта махфий экани ва душман қўлига тушса қўшинлар ҳаётига хавф туғдириши мумкинлиги сабабли, уни тижорат иловаси орқали тарқатиш номақбул деб топилган.
