Хитойда Мьянма шимолида фаолият юритган жиноий тўдалар билан алоқадор 11 нафар шахс қатл этилди. Уларнинг орасида онлайн фирибгарлик билан шуғулланган гуруҳларнинг асосий аъзолари ҳам бор. Бу ҳақда бугун, 29 январь куни “The Asahi” хабар берди.
Қайд этилишича, мазкур шахслар 2025 йил сентябрь ойида ўлим жазосига ҳукм қилинган. Қатллар шарқий Чжэцзян провинциясининг Вэньчжоу шаҳридаги суд томонидан ижро этилган. Бироқ расмийлар жиноятчиларнинг шахси ва содир этган жиноятлари тафсилотларини ошкор қилмаган. BBC мазкур 11 киши Мин мафия оиласи аъзолари бўлганини аниқлаган.
Сўнгги йилларда Хитой Жануби-Шарқий Осиёда кенг тарқалган “фирибгарлик марказлари” фаолиятига барҳам бериш мақсадида минтақа давлатлари – Таиланд, Мьянма ва Камбоджа билан ҳамкорликни кучайтирган. Мутахассисларнинг таъкидлашича, бу чоралар натижасида ўн минглаб жиноятда гумон қилинганлар Хитойга қайтарилган.
Хусусан, ўтган йили Хитой Жамоат хавфсизлиги вазирлиги Мьянманинг жануби-шарқида, Таиланд билан чегарадош Мьявади шаҳридан онлайн қимор ўйинлари ва телекоммуникация фирибгарлигида гумон қилинган 7600 нафардан ортиқ хитойлик фуқаро ватанига қайтарилганини маълум қилган.
