Хитой Россиядан нефть харидини кескин оширди. Бунга Ҳиндистоннинг Россия нефтини импорт қилишни қисқартиргани сабаб бўлган. Бу ҳақда бугун, 21 февраль куни “Bloomberg” хабар берди.
Маълумотларга кўра, февраль ойининг дастлабки 18 кунида Россиянинг Хитойга нефть етказиб бериш ҳажми кунига 2,09 миллион баррелгача етган. Таққослаш учун, бу кўрсаткич январда 1,72 миллион баррелни, декабрда эса 1,39 миллион баррелни ташкил этган.
Шу билан бирга, Россиянинг Ҳиндистонга нефть экспорти кунига тахминан 1,2 миллион баррелгача камайган. Бу 2025 йил июнь ойида қайд этилган энг юқори кўрсаткичдан қарийб 40 фоизга паст.
Таҳлилчиларга кўра, Хитой ҳозирда Россия нефти учун “охирги харидор” ролини бажармоқда. Таҳлилчи Жун Гуонинг айтишича, катта чегирмалар Хитой компаниялари учун муҳим рағбат бўлмоқда.
Бироқ таъминотни Хитойга йўналтириш логистика жиҳатидан мураккаб. Россиянинг Болтиқбўйи портларидан Хитойнинг Шандун провинциясигача бўлган масофа тахминан 23 300 километрни ташкил этади. Ҳиндистоннинг Жамнагар портигача бўлган йўл эса қарийб 14 200 километр. Узоқ йўналишлар ва танкерларнинг кечикиши сабаб “сувдаги” нефть ҳажми 140 миллион баррелгача ошган. Бу 2025 йил август охиридаги кўрсаткичдан 60 фоиз юқори.
Нашрнинг ёзишича, нефть йўналишидаги ўзгаришлар 2025 йил август ойида Ҳиндистон АҚШ босими остида харидларни қисқартиришни бошлаганидан сўнг юзага келган. Шундан сўнг Россия Хитой харидорларига чегирмали нарх таклиф қилиб, экспортни шу йўналишга кўпроқ йўналтира бошлаган.
