Жиззах вилоятида ноқонуний криптовалюта айирбошлаш билан шуғулланиб келган шахс аниқланди. Бу ҳақда Жиззах вилояти ИИБ ахборот хизмати хабар қилди.
Тезкор маълумотларга асосан ўтказилган тадбирда Тошкент шаҳридаги олий таълим муассасаларидан бирида таҳсил олаётган, 2002 йилда Миср Араб Республикасида туғилган шахснинг қонунчиликка зид равишда криптоактивлар айирбошлаш фаолияти билан шуғулланиб келаётгани маълум бўлган. Унинг қўл телефони холислар иштирокида кўздан кечирилганда, криптовалютани сақлаш, қабул қилиш ва юбориш учун мўлжалланган махсус дастур ҳамда электрон криптоҳамён борлиги тасдиқланган.
Ўтказилган текширувлар натижасида ушбу электрон ҳамён орқали жами 1 миллиард 250 миллион 319 минг 973 сўм миқдорида криптоактивлар айирбошлангани аниқланган.
Мазкур ҳолат юзасидан Жиззах вилояти ИИБ томонидан Жиноят кодексининг 278-8-моддаси 3-қисми “а” банди билан жиноят иши қўзғатилиб, дастлабки тергов ҳаракатлари олиб борилмоқда.
