Самарқандда чегара орқали Ўзбекистонга Starlink қурилмасини ноқонуний олиб кирмоқчи бўлганлар ушланди. Бу ҳақда Самарқанд вилояти божхона бошқармаси хабар берди.
Қайд этилишича, “Жартепа” чегара божхона постида қўшни давлатдан Ўзбекистон ҳудудига кириб келаётган фуқаро бошқарувидаги Mercedes Benz русумли автотранспорт воситаси белгиланган тартибда божхона назоратидан ўтказилган.
Текширув жараёнида транспорт воситасининг юкхона қисмида йўловчи божхона декларациясида кўрсатилмаган, шунингдек, тегишли рухсатномаси мавжуд бўлмаган, қиймати тахминан 6 миллион сўмлик 1 дона Starlink қурилмаси борлиги аниқланган. Ҳолат юзасидан процессуал ҳужжатлар расмийлаштирилган.
Самарқанд вилояти Электромагнит мослашув хизмати томонидан берилган хулосага кўра, мазкур орбитал сунъий йўлдош алоқа қурилмасини республика ҳудудига махсус рухсатномаларсиз олиб кириш ва ишлатиш мумкин эмаслиги яна бир бор тасдиқланган.
Айни пайтда ушбу ҳолат бўйича фуқарога нисбатан Жиноят кодексининг тегишли моддалари асосида жиноят иши қўзғатилган.
