Россия ўз қўшинларини Сурия шимоли-шарқидаги, собиқ курд автономияси ҳудудида жойлашган Қамишли аэропортидан олиб чиқиб кетди. Бу ҳақда манбаларга таяниб Reuters хабар берди.
Маълум қилинишича, қўшинлар ва қуролларни олиб чиқиш ўтган ҳафта бошланган. Кучларнинг бир қисми Сурия ғарбидаги Россиянинг Хмеймим авиабазасига кўчиши, яна бир қисми Россияга қайтиши кутилганди.
“Охирги икки кун ичида Қамишлидан Хмеймимга ҳарбий техника ва оғир қуроллар олиб ўтилган”, деди Сурия хавфсизлик хизматидаги манба.
Шу билан бирга, Reuters журналисти 26 январь куни Қамишли аэропортида Россия байроқлари ҳануз ҳилпираб турганини, учиш-қўниш йўлагида эса Россия белгилари туширилган икки самолёт бўлганини қайд этди.
Аl Monitor нашри эса ўз мухбирининг Қамишлидаги базаси ҳудудида олинган видеосини эълон қилди. Унда қўшинлар чиқиб кетаётганда аэропортда қолдирилган буюмлар, шунингдек, алоқа минораси устида ҳилпираб турган Россия байроқлари акс этган.
Қамишли — Россиянинг Суриядаги учта базасидан бири. Россия бу ерга 2019-йилда ўз қўшинларини жойлаштирган ва Сурияда ҳокимият алмашганидан кейин уларни сақлаб қолган. Бироқ Башар Асад ҳукумати ағдарилгандан сўнг, аэропорт ҳарбий аҳамиятини йўқотди.
Россиянинг “Коммерсантъ” газетаси 21 январь куни хабар беришича, Сурия расмийлари курдлар бу ҳудуддан сиқиб чиқарилгач, Россия ҳарбийларидан аэропортни тарк этишни сўраган. Чунки “у ерда Россия қўшинлари учун энди иш қолмагани” ҳақида хабар берган.
