Фаластин Туризм ва қадимий обидалар вазирлиги Исроилни босиб олинган Ғарбий Соҳилдаги Рамаллаҳ шаҳрида тарихий артефактларни ноқонуний олиб қўйишда айблади ва вазиятга аралашиш учун тегишли халқаро ташкилотларга мурожаат қилди. Бу ҳақда Anadolu хабар берди.
Вазирлик хабарига кўра, 4 декабрь куни Исроил кучлари Хирбет ал-Бурж археологик ёдгорлигидан Византия даврига оид устунларни олиб кетиш учун экскаватор ва крандан фойдаланган. Гувоҳларнинг айтишича, яҳудий армияси Исроил Фуқаролик маъмурияти аъзолари билан биргаликда Ал-Мазраъа аш-Шарқия тоғли ҳудудида рейд ўтказган.
Ҳарбийлар бу ҳудудда жойлашган бешта Византия устунини олиб кетган. Исроил ОАВнинг хабар беришича, устунлар фаластинликлар томонидан ҳудудда бинолар қуриш орқали тарихий обидаларга зарар етказилгани важлари билан мусодара қилинган.
Халқаро қонунларнинг бузилиши
Фаластин маъмурияти бундай ҳаракатлар халқаро қонунларни, жумладан, 1954-йилдаги Гаага конвенцияси ва унинг протоколлари, шунингдек, 1970 ва 1972-йиллардаги ЮНЕСКО конвенцияларини бузишини таъкидламоқда.
Вазирлик халқаро ташкилотларни Фаластиннинг миллий меросини ҳимоя қилиш ва бу талончиликни тўхтатиш учун шошилинч чоралар кўришга чақирган. Фаластин маъмурияти ЮНЕСКО каби тегишли институтларга мурожаат қилишни ва ўғирланган артефактларни қайтаришни талаб қилишни режалаштирмоқда.
Фаластин туризм ва қадимий обидалар вазири Ҳани ал-Ҳаек Исроил ҳужумлари оқибатида 316 та археологик ва тарихий ёдгорлик тўлиқ ёки қисман вайрон қилингани ҳақида хабар берган.
“Бу ҳужумлар Фаластин тарихини ўчириб ташлашга қаратилган ҳарбий жиноятдир”, деган эди у.
Шунингдек, Ажратиш деворига ва яҳудий аҳоли пунктларига қарши кураш бўйича кенгаш раҳбари Муаед Шабан 18 ноябрь куни Исроил археологик ёдгорликларни ҳимоя қилишни ниқоб қилиб, Наблус шаҳрида жойлашган Сабастия ва Бурқа ҳудудларида, тахминан, 460 гектар ерни мусодара қилишни режалаштираётганини маълум қилган.
