Бугун, 22 декабрь куни Исроил Вазирлар Маҳкамаси мамлакатдаги машҳур миллий радиостанциялардан бири – Армия радиоси фаолиятини тўхтатиш учун овоз берди. Бош вазир Биньямин Нетаньяхунинг ўнг қанот коалицияси томонидан илгари сурилган мазкур қарор танқидчилар томонидан демократияга зарба сифатида баҳоланмоқда. Бу ҳақда “Haaretz” хабар қилди.
Маълум қилинишича, Мудофаа вазири Исроил Кац Армия радиосини 2026 йил 1 мартга қадар ёпишни таклиф қилган. Унинг таъкидлашича, бу қадам ҳарбийларнинг бетарафлигини сақлаб қолиш мақсадида ташланган.
Кацнинг айтишича, радиостанция дастлаб Исроил аскарлари учун ахборот бериш воситаси сифатида ташкил этилган бўлса-да, вақт ўтиши билан у “Исроил Мудофаа Кучлари (ЦАХАЛ) ва аскарларига қарши чиқадиган қарашлар учун платформага” айланган.
Армия радиоси Исроилда давлат томонидан молиялаштириладиган икки йирик ахборот воситасидан бири ҳисобланади. Иккинчиси – КАН жамоат телерадиокомпанияси бўлиб, у телевизион янгиликлар канали, бир нечта радиостанциялар ҳамда оммабоп рақамли платформани бошқаради. Ҳар иккала ОАВ ҳам таҳририй жиҳатдан мустақил саналади.
Мудофаа вазирининг таъкидлашича, тинч аҳолига мўлжалланган радиоэшиттиришларни армия томонидан бошқарилиши ҳар қандай демократик давлат учун ноодатий ҳолатдир. Нетаньяху Вазирлар Маҳкамаси йиғилишида бу борада шундай деди,
“Бу амалиёт Шимолий Кореяда ва эҳтимол яна бир нечта мамлакатларда мавжуд. Биз эса бундай рўйхатда бўлишни истамаймиз”.
Қарорга нисбатан танқидлар кучли бўлди. Сўз эркинлиги ҳимоячилари бу ҳаракат мустақил оммавий ахборот воситаларига босим сифатида баҳоламоқда. Исроил Журналистлар иттифоқининг матбуот эркинлиги бўйича масъул ходими Анат Сарагусти Тель-Авивда юзлаб журналистлар иштирокида ўтган анжуманда, улар итоаткор оммавий ахборот воситаларини хоҳлашини танқидий ОАВни эса хоҳламаслигини айтишди.
Шунингдек, Исроилдаги коррупцияга қарши мустақил назорат органи — “Сифатли ҳукумат учун ҳаракат” ҳукумат қарорига қарши Олий судга мурожаат қилганини маълум қилди.
“Давлатга қарашли оммавий ахборот воситасини ёпиш алоҳида қадам эмас. Бу Исроил демократиясига мунтазам зарар етказилаётган хавотирли жараённинг бир қисмидир”, дейилади ташкилот баёнотида.
Маълумот ўрнида, Нетаняху коалициясининг бошқа ташаббуслари қаторига миллий хавфсизликка таҳдид солади деб топилган ОАВ фаолиятини чеклаш имконини берувчи фавқулодда қонунни кенгайтириш ҳамда бутун Исроил медиа бозорини қамраб олувчи ислоҳотлар киради. Ушбу қонун аввалроқ Ғазо уруши чоғида Исроилда Al Jazeera араб телеканали фаолиятини тақиқлаш учун қўлланилган эди.
