ДХХнинг Тошкент вилояти бўйича бошқармаси ва божхона идоралари ходимлари ҳамкорлигида ўтказилган тезкор тадбир давомида хорижий валютани “ташмачилар” ёрдамида Қозоғистонга ноқонуний йўл билан олиб чиқиб кетиш ҳолати олди олинди.
Тошкент туманида ўтказилган тадбирда гуруҳ етакчиси — 1995-йилда туғилган шахс 5 млн 622 минг Россия рубльини қисмларга ажратган ҳолда Қозоғистонга етказиб бериш учун “ташмачи”га топшираётган вақтида ушланди.
Кейинги жараёнларда унинг автомобильи ва яшаш уйидан 11 220 АҚШ доллари ҳамда маблағларнинг ҳақиқий эгалари қайд этилган дафтар процессуал тартибда расмийлаштириб олинди.
Мазкур шахсга нисбатан Жиноят кодексининг 25, 182-моддаси 2-қисми “а” банди билан жиноят иши қўзғатилди ва унга қамоқ эҳтиёт чораси қўлланди. Ҳозирда тергов ҳаракатлари давом этмоқда.
