Президент Шавкат Мирзиёев 8 декабрь – Ўзбекистон Республикаси Конституцияси куни муносабати билан халққа табрик йўллади. Қутлов матнида бош қомуснинг давлат бошқаруви, фуқаролар ҳуқуқ ва эркинликларини таъминлаш ҳамда демократик ислоҳотлар тизимидаги ўрни муҳимлиги таъкидланган.
Табрикда Конституция мамлакатда тинчлик, барқарорлик, қонун устуворлиги, очиқ жамият ва халқ ҳокимиятчилиги тамойилларининг бош кафолати экани қайд этилган. Сўнгги йилларда парламент ваколатлари кенгайгани, маҳаллий кенгаш раисларининг депутатлар орасидан сайланиши, маҳалла институтининг жамият бошқарувидаги ўрнининг ортгани конституциявий ислоҳотларнинг амалдаги натижалари экани ёзилган.
Янги парламент томонидан суд-ҳуқуқ тизими, инсон ҳуқуқларини ҳимоя қилиш, ижтимоий ҳимоя, ёшлар ва хотин-қизлар масалалари, кам таъминланганлар манфаатларини қўллаб-қувватлаш бўйича бир қатор муҳим қонунлар қабул қилингани билдирилган. Маҳаллий кенгашларда ўтган даврда 25 мингдан ортиқ масала кўриб чиқилгани ва мансабдор шахсларга 14 мингга яқин депутатлик сўрови юборилгани қайд этилган.
“Вакиллик органларини чинакам халқ минбари, халқ овозига айлантиришга қаратилган ислоҳотларимизнинг давоми сифатида 2026-йилнинг 1 январидан туман ва шаҳарларда ҳам ҳоким ва Кенгаш раислари вазифаларини алоҳида ажратиш бўйича тегишли чора-тадбирларни амалга оширамиз. Бир сўз билан айтганда, халқ ҳокимиятчилиги, вакиллик демократияси, Конституция ва қонун устуворлиги каби конституциявий принципларга бундан буён ҳам содиқ қолиб, ушбу йўналишдаги ислоҳотларимизни янада қатъий давом эттирамиз”, дейилади табрик матнида.
Қутловда мамлакатда инсон қадри ва ижтимоий адолат тамойиллари асосида амалга оширилаётган ислоҳотларнинг натижалари ҳам келтирилган. Хусусан, аҳоли жон бошига даромад 3 500 долларга етгани, мактабгача таълим қамрови 78 фоизга, олий таълим қамрови 42 фоизга кўтарилгани, ўртача умр кўриш ёши 73,8 ёшдан 75,1 ёшга узайгани қайд этилган.
Бир миллиондан зиёд фуқаронинг камбағалликдан чиқарилгани, мамлакатда камбағаллик даражаси 6,6 фоизга тушгани маълум қилинган.
Табрикда Ўзбекистоннинг халқаро рейтинглардаги ўрни ҳам алоҳида тилга олинган. 2025-йилда Барқарор ривожланиш мақсадлари индексида мамлакат 19 поғонага кўтарилган, Глобал инновация индексида Марказий ва Жанубий Осиёдаги энг яхши ривожланаётган учликка кирган. С&P, Fitch ва Moodyʼs агентликлари Ўзбекистоннинг суверен кредит рейтингини оширган.
ЮНЕСКО Бош конференциясининг сўнгги 40 йилда илк бор Париждан ташқарида — Самарқандда ўтказилгани халқаро миқёсда мамлакат нуфузини оширган воқеа сифатида баҳоланган.
Табрик якунида Конституция нормаларини янада чуқур ўрганиш, ёшлар онгида конституциявий қадриятларни мустаҳкамлаш, қонунга ҳурмат ва ҳуқуқий маданиятни ошириш долзарб вазифа экани таъкидланган. Фуқароларга сиҳат-саломатлик, фаровонлик ва тинчлик тилаклари билдирилган.
