Энди қимматбаҳо тошларни ноқонуний муомалага киритиш учун 1 йилгача қамоқ жазоси жорий этилади. Бу ҳақда кеча, 21 март куни қабул қилинган “Ўзбекистон Республикасининг айрим қонун ҳужжатларига валюта ҳамда қимматбаҳо металлар ва қимматбаҳо тошлар муомаласи билан боғлиқ муносабатларни такомиллаштиришга қаратилган ўзгартиришлар ва қўшимча киритиш ҳақида”ги қонунда сўз боради.
Жиноят кодексига киритилган ўзгартиришларга кўра, қимматбаҳо металлар ва (ёки) қимматбаҳо тошларни қонунга хилоф равишда олиш ёки ўтказиш шундай ҳаракатлар учун маъмурий жазо қўлланилганидан кейин содир этилган бўлса жиноий жавобгарликка сабаб бўлиши белгиланган.
Киритилган ўзгартишларга кўра, Маъмурий жавобгарлик тўғрисидаги кодекснинг 170-моддасига асосан, қимматбаҳо металллар ва (ёки) қимматбаҳо тошларни ноқонуний сотиб олиш ёки сотиш уларни мусодара қилишга, шунингдек 15 суткагача маъмурий қамоққа олишга олиб келади. Маъмурий қамоқ қўлланилмайдиган шахслар учун эса 10 дан 20 базавий ҳисоблаш миқдоригача жарима белгиланади.
Агар мазкур ҳуқуқбузарлик учун аввал маъмурий жазо қўлланган бўлса ва шу каби ҳаракат қайта содир этилса, бу ҳолат жиноий жавобгарликка сабаб бўлади.
Бундай жиноят учун 75 дан 100 базавий ҳисоблаш миқдоригача жарима, 2 йилдан 3 йилгача ахлоқ тузатиш ишлари, 1 йилгача озодликни чеклаш ёки 1 йилгача озодликдан маҳрум қилиш жазоси белгиланган.
Шунингдек, Жиноят кодексида қимматбаҳо металллар ва тошлар тушунчасига аниқ таъриф берилган.
Қимматбаҳо металлларга олтин, кумуш, платина ва платина гуруҳига кирувчи металлар – палладий, иридий, родий, рутений ҳамда осмий киритилади. Улар ҳар қандай кўриниш ва ҳолатда, жумладан қуйма, аффинаж қилинган шаклда, шунингдек хомашё, қотишма, ярим тайёр маҳсулот, саноат буюмлари, кимёвий бирикмалар ва чиқиндилар таркибида ҳам бўлиши мумкин. Бундан заргарлик буюмлари ва маиший маҳсулотлар ҳамда уларнинг ломлари мустасно.
Қимматбаҳо тошларга эса табиий олмос, ёқут, зумрад, сапфир, александрит ҳамда табиий марварид киради. Улар ҳам хом (табиий) ва ишлов берилган ҳолда бўлиши мумкин. Заргарлик буюмлари ва маиший маҳсулотлар ҳамда уларнинг ломлари бу тоифага киритилмайди.
