Ўзбекистон Малайзиянинг миллий автомобилсозлик компанияси — Proton Holdings билан ҳамкорлик қилади.
Инвестициялар, саноат ва савдо вазирлигининг хабар беришича, Лазиз Қудратов 10 ноябрь куни ушбу компания вице-президенти Айнол Азмил бин Абу Бакар билан учрашди. Музокаралар давомида Ўзбекистоннинг саноат салоҳиятини мустаҳкамлаш ва янги иш ўринларини яратишга қаратилган ҳамкорлик лойиҳаларини амалга ошириш ҳамда шериклик муносабатларини кенгайтириш масалалари муҳокама қилинди.
Малайзиянинг ушбу компанияси Ўзбекистонда автомобилсозлик соҳасида қўшма инвестициявий лойиҳани амалга оширишни режалаштираётгани 2024 йил январида маълум қилинганди. Ўзбекистон элчихонаси дипломатлари Proton компанияси заводи фаолияти билан танишганди. Proton ва “Ўзавтосаноат” АЖ ўртасида Ўзбекистонда автомобиллар ишлаб чиқариш бўйича амалга оширилиши режалаштирилаётган қўшма инвестиция лойиҳаси тақдимот қилинганди.
Proton Holdings — Малайзиянинг миллий автомобилсозлик компанияси бўлиб, 1983-йилда мамлакатнинг биринчи миллий автомобиль бренди сифатида ташкил этилган. Компаниянинг бош офиси Селангор штатида жойлашган.
