Кеча, 11 ноябрь куни АҚШ денгиз флоти таркибидаги USS Gerald R. Ford авиация ташувчиси бошчилигидаги зарба гуруҳи Жанубий қўмондонлик (Кариб денгизи, Марказий ва Жанубий Америка учун масъул) ҳудудига етиб борди. Бу ҳақда АҚШ денгиз флотининг Тўртинчи флотига таяниб, ABC News хабар берди.
More stories“11 ноябрь куни АҚШ денгиз флоти зарба гуруҳи, дунёдаги энг йирик авиация ташувчиси USS Gerald R. Ford бошчилигида АҚШ Қуролли кучлари Жанубий қўмондонлиги масъулият зонаси ҳудудига кирди”, дейилади расмий пресс-релизда.
Бу ҳаракат АҚШ Мудофаа вазири Пит Ҳегсетнинг буйруғи билан Президент томонидан берилган “халқаро жиноят тармоқларини йўқ қилиш ва наркотерроризмга қарши кураш орқали мамлакат хавфсизлигини таъминлаш” ҳақидаги фармонни қўллаб-қувватлаш мақсадида амалга оширилган.
Авиация ташувчида 4 минг нафар ҳарбий жойлашган. Унинг бортида F/A-18E/F жанговар бомбардимончи самолётлари, E/A-18G Growler радиоэлектрон кураш самолётлари, E-2D Hawkeye узоқ масофали радиолокацион кузатув самолётлари, MH-60 кўп мақсадли вертолётлар ҳамда C-2 Greyhound ҳарбий-транспорт самолётлари бор.
Кема USS Bainbridge ва USS Mahan бошқарилувчи ракетали эсминецлари, шунингдек, ҳаво ва ракетага қарши мудофаа мувофиқлаштирувчиси USS Winston S. Churchill томонидан кузатиб борилмоқда.
Авиация ташувчиси ва унинг эскорти етиб бориши билан АҚШнинг минтақадаги ҳарбий мавжудлиги 13 та жанговар кемага етган. Аввал бу ҳудудда икки крейсер, учта эсминец ва Tomahawk қанотли ракеталари билан жиҳозланган атом сувости кемаси жойлашганди. Шунингдек, минтақада қирғоқ зонасидаги кема ва учта йирик десант кемасидан иборат десант гуруҳи ҳам бор бўлиб, уларнинг бортида 3 минг нафар денгиз пиёдаси мавжуд.
Пуэрто-Рикодаги АҚШ ҳарбий базаларида эса ҳозирда 10 та F-35B Lightning II қирувчи самолёти, 6 та AV-8B Harrier, 12 та MV-22B Osprey конвертоплани, 7 та MQ-9 Reaper зарба дрони ва 13 та вертолёт жойлашган. Бундан ташқари, у ерда сувости патруль самолётлари, транспорт самолётлари ва ёқилғи қуювчи ҳаво танкерлар ҳам мавжуд.
