Венесуэла Президенти Николас Мадуро АҚШнинг Кариб минтақасидаги ҳарбий фаоллиги ортидан Россия раҳбари Владимир Путинга мурожаат қилиб, мамлакатга ракеталар, радарлар ва модернизация қилинган самолётлар етказиб беришни сўраган. Бу ҳақда махфий ҳужжатларга таянган ҳолда “The Washington Post” хабар берди.
Манбаларга кўра, Венесуэла, шунингдек, Хитой ва Эронга ҳам мурожаат қилган. Мадуоро Хитой раҳбари Си Цзиньпинга йўллаган хатида икки давлат ўртасида “ҳарбий ҳамкорликни кенгайтириш”ни сўраб, бу “АҚШ ва Венесуэла ўртасидаги кескинликка жавоб чораси” эканини билдирган.
Эрон томони билан алоқани Венесуэла Транспорт вазири Рамон Селестино Веласкес олиб бормоқда. У илгари ҳарбий техника етказиб беришни мувофиқлаштирган ва Эронни шахсан боришни режалаштирган. Ҳужжатларда айтилишича, Каракас “разведка ускуналари”, GPS сигналларини тўсувчи қурилмалар ва эҳтимолий 1 000 км масофага учувчи дронларга эҳтиёж сезмоқда.
Қайд этиш жоиз, Трамп ва Мадуро ўртасидаги қизил чизиқ аллақачон кесиб ўтилган. Трамп Мадуро бошчилигидаги ҳокимиятни гиёҳванд моддаларни тарқатишда айблайди ва унга бир неча бор қидирувлар эълон қилган. Қолаверса, Трамп Венесуэладаги гиёҳванд модда ишлаб чиқариш объектларига зарба бериш режасини кўриб чиққан.
Трамп аввалроқ Венесуэлага қарши зарбалар бўлиши мумкинлигини рад этган бўлса-да,нашр манбалари Мадуоронинг Россияга мурожаати айнан шу вазият фонида юборилганини билдиради.
Газетанинг ёзишича, махфий ҳужжатларда Хитой ва Эроннинг бу мурожаатларга қандай жавоб бергани кўрсатилмаган. Аммо нашрга кўра, “Мадуронинг асосий нажот ҳалқаси” Россия бўлиб қолмоқда – “Flightradar24” маълумотларига кўра, жорий йилнинг 26 октябрь куни Россиянинг Ил-76 самолёти Каракасга қўнган, эртаси куни эса Россия Венесуэла билан стратегик ҳамкорлик шартномасини ратификация қилган.
Россия Кенгаши халқаро ишлар қўмитаси раис ўринбосари Владимир Жабборовнинг айтишича, Москва тўғридан-тўғри ҳарбий можаро аралашмайди, аммо шартномага мувофиқ ёрдам кўрсатишга тайёр.
“Агар америкаликлар ҳозир Венесуэлага қарши агрессия бошласа, бу улар учун жуда қимматга тушади. Ўтган ўн йилликларда АҚШнинг барча ҳарбий можаролари ёмон якун топганини эслайлик масалан, Афғонистондан қандай қочишганини”, деган Жабборов.
У, шунингдек, Россия ва Венесуэла ўртасидаги шартномада “ёпиқ бандлар” ҳам бўлиши мумкинлигини айтиб, бу масалада изоҳ бериш “ножоиз” эканини қўшимча қилган.
Ҳозирча на Кремль, на Венесуэла элчихонаси нашр маълумотларига расмий изоҳ берган.
