Тошкент вилоятида чиқинди ташиш хизмати учун аҳолидан асоссиз ундирилган 8,8 миллиард сўм қайта ҳисоб-китоб қилинадиган бўлди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Маълум қилинишича, қўмитанинг Тошкент вилояти ҳудудий бошқармаси вилоятда аҳолига маиший чиқинди ташиш хизмати кўрсатилиши ҳолатини ўрганиб чиқди. Ўрганишлар давомида бир қатор қонунбузилишлар яъни айрим хонадонлардан чиқиндилар умуман олиб кетилмаган бўлса-да, уларга тўловлар ҳисобланган ва хизмат белгиланган даражада кўрсатилмаган ҳолатлар ҳам аниқланди.
Юқоридаги аниқланган ҳолатлар юзасидан ҳудудий бошқарма махсус комиссияси томонидан “Раҳнамо Сервис”, Zero-Waste, “Зангиота Ободон”, “Ангрен Бунёд Файз” ва “Оҳангарон санитария тозалаш” МЧЖларига нисбатан “Истеъмолчилар ҳуқуқларини ҳимоя қилиш тўғрисида”ги қонун талаблари бузилиш билан белгиланган тартибда иш қўзғатилиб, натижаси юзасидан 250 мингга яқин истеъмолчига 8,8 миллиард сўмдан ортиқ маблағ қайта ҳисоб-китоб қилиниши бўйича қарор қабул қилинди.
Қонун бузилиши ҳолатини бартараф этиш ва келгусида йўл қўймаслик юзасидан кўрсатма ҳам берилган.
