Электр таъминоти корхонаси муҳандиси Фарғона вилоятида 100 млн ва Жиззах вилоятида 40 млн сўм пора олган вақтида қўлга тушди. Бу ҳақда Давлат хавфсизлик хизмати хабар берди.
Қайд этилишича, Фарғона тумани электр таъминоти корхонаси муҳандиси хизмат мавқеидан фойдаланиб, фуқаронинг қурилиш маҳсулотлари ишлаб чиқариш цехига электр тармоғи тортиш, электр ҳисоблагич ўрнатиб, улаб бериш, шунингдек, мансабдор танишлари орқали рухсат берувчи ҳужжатларни тайёрлатиб бериш эвазига 100 млн сўм талаб қилган. ДХХ Фарғона вилояти бўйича бошқармаси ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда муқаддам судланган муҳандис сўралган пул маблағини олган вақтида ашёвий далиллар билан ушланган.
Бошқа ҳолатда эса Жиззах вилояти Шароф Рашидов тумани электр таъминоти корхонаси муҳандиси ҳам ўз хизмат мавқеидан фойдаланиб, маҳаллий фермер хўжалигининг электр энергиясидан мавжуд 122 млн сўм қарздорлигини мансабдор танишлари орқали йўқ қилиб бериш эвазига 50 млн сўм талаб қилиб, муқаддам 10 млн сўм олган. ДХХ ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда у қолган 40 млн сўмни олган вақтида ушланган.
Ҳозирда ҳар икки ҳолат бўйича муҳандисларга нисбатан жиноят ишлари қўзғатилиб, тергов ҳаракатлари олиб борилмоқда.
