Грузияда мамлакат ҳудудида ноқонуний яшаб келган 59 нафар хорижлик ушланди. Улар орасида Ўзбекистон фуқаролари ҳам бор. Бу ҳақда Грузия Ички ишлар вазирлигига таяниб “Report.az” хабар берди.
Ушланганлар Ўзбекистон, Озарбайжон, Кения, Туркия, Россия, Ҳиндистон, Миср, Гана, Эфиопия, Филиппин, Судан, Камерун ва Хитой фуқаролари ҳисобланади.
Миграция департаменти ходимлари махсус иммиграция назорати доирасида хорижликлар бўлиши мумкин бўлган қатор манзил ва объектларни текширган.
Текширув давомида 59 киши Грузияда хорижликлар ва фуқаролиги бўлмаган шахсларнинг ҳуқуқий мақоми тўғрисидаги қонун талабларини бузган ҳолда яшаётгани аниқланган.
“Улар Миграция департаментининг вақтинча сақлаш марказига жойлаштирилган. Ҳозирда хорижликларни Грузиядан чиқариб юбориш бўйича тегишли тартиб-таомиллар олиб борилмоқда”, дейилади хабарда.
Ўзбекистон фуқароларининг аниқ сони, уларнинг ёши, жинси ва шахсига оид бошқа маълумотлар очиқланмаган.
Грузия ИИВ маълумотига кўра, миграция қонунчилигига ўзгартиришлар кучга кирганидан буён 160 та махсус иммиграция назорати тадбири ўтказилган. Уларда жами 18 мингга яқин хорижлик текширилган, аниқланган ноқонуний мигрантларнинг минг нафари мамлакатдан чиқариб юборилган.
8 сентябрь куни Грузиядан яна 61 нафар хорижлик чиқариб юборилган. Улар орасида ҳам Ўзбекистон фуқаролари бўлган. Йил бошидан буён мамлакатдан депортация қилинган хорижликлар сони қарийб 3 минг нафарга етган.
