Андижонда тадбиркорни ёлланма қотил орқали ўлдиришни режалаштирган жиноий гуруҳ аъзолари ушланди. Бу ҳақда Ички ишлар вазирлиги хабар қилди.
Қайд этилишича, жорий йилнинг 4 февраль куни Андижон вилоятида якка тадбиркорлик билан шуғулланувчи шахс Ички ишлар бўлимига ўзига нисбатан уюштирилаётган суиқасд бўйича ариза билан мурожаат қилган. У беш нафар жиноятчидан иборат уюшган гуруҳ 1500 доллар эвазига қотил ёллаб, уни қасддан ўлдириб беришни келишганини билдирган.
Бунда 1984 йилда туғилган “Роналдо” лақабли муқаддам жиноят кодексининг 8 та моддаси билан судланган жиноий гуруҳ етакчиси ёлланма қотилга тадбиркорни ўлдириши учун 1500 доллар беришга келишиб, дастлаб 300 минг сўм пулни бераётган вақтда қўлга олинган.
Тезкор тадбир давом эттирилиб, 1984 йилда туғилган, муқаддам судланган “Главрач” лақабли вилоят Пахтаобод тумани Тиббиёт бирлашмаси бошлиғи, 1984 йилда туғилган, судланган “Боксёр” лақабли ва 1984 йилда туғилган фуқаро, шунингдек 2003 йилда туғилган Тиббиёт институти талабаси ҳам ушланган.
Ҳолат юзасидан мазкур жиноий гуруҳ аъзоларига нисбатан Жиноят кодексининг тегишли моддалари билан иш очилди.
