Туркияда сўнгги ҳафталарда нафас йўллари инфекциялари кескин кўпайган. Бу ҳақда шифокор, ўпка касалликлари бўйича мутахассис проф. Шевкет Ўзкая маълум қилди.
Унинг айтишича, грипп, COVID-19 ва RSV вируси бир пайтнинг ўзида тарқалаётгани сабабли мамлакатда «учталик эпидемия» кузатилмоқда.
Ўзкаянинг сўзларига кўра, дунёда тез суръат билан ёйилаётган COVID-19’нинг янги, «Франкенштейн» деб номланган варианти эндиликда Туркияда ҳам қайд этилган.
«Ҳозирча оғир ёки ҳаёт учун хавфли ҳолатлар аниқланмади, аммо бу штамм жуда юқумли ва Европадан то Осиёгача тез тарқалмоқда», – дейди профессор.
Шифокор ҳозирги иқлим шароитига ҳам эътибор қаратиб, кун давомидамги кескин иссиқ-совуқ алмашиши иммун тизимини заифлаштираётгани, шу боис гриппга ўхшаш касалликлар узоқ давом этаётгани ва бу бир нечта вируснинг таъсирида оғирлашаётганини айтади.
Профессор Ўзкая грипп ёки ковид ўтказган баъзи беморларда касаллик ўпкага тушиб, зотилжамга (пневмония) айланиши мумкинлигини таъкидлади.
«Бу вируслар одамни бутунлай ётқизиб қўймайди, аммо кундалик фаолиятни қийинлаштиради. Кўпчилик касал бўлганини билмаган ҳолда ишга чиқишда давом этаётгани сабабли, вирус тарқалиши кенгаймоыда», – деди у.
Шифокор, фуқароларга гриппга ўхшаш белгилар (йўтал, иситма, бўғим оғриғи) сезилганда уйда дам олишни, узоқ йўтал ёки нафас қисилиши бўлса, шифокорга мурожаат қилиб, ўпка рентгени текширишни ҳамда карантин қоидаларига риоя қилишни тавсия қилмоқда.
