Бухоро вилоятининг Қоракўл туманида фаолият юритаётган «BIJAR SOLAR INFRASTRUCTURE» масъулияти чекланган жамияти ишчилари ўз меҳнати учун ҳақдор бўлган иш ҳақларини тўлиқ ололмаётганини билдириб, Мажбурий ижро бюросининг вилоят бошқармасига мурожаат қилишган.
Маълум бўлишича, 28 нафар ишчининг иш ҳақи нотўғри ҳисобланган, меҳнат таътили кунлари учун ҳақ тўланмаган ҳамда белгиланган коэффицентлар инобатга олинмаган.
Бюронинг жамоатчилик билан алоқалар ва ҳуқуқий ахборот бўйича катта инспектори Ихтиёр Олимовнинг маълум қилишича, бюронинг Олот туман бўлими мурожаат юзасидан тезкор чора кўрган. Корхона масъулларига қонуний огоҳлантириш берилган бўлса-да, талаб ихтиёрий равишда бажарилмаган.
Шундан сўнг корхонанинг банк ҳисоб рақамларига банд солиниб, барча мол-мулкларига таъқиқ қўйилган.
Фуқаролик ишлари бўйича Қоракўл туманларо суди қарорига асосан, қарздор жамият ишчилар фойдасига 120,9 миллион сўм иш ҳақи ва маънавий зарарни қоплаб беришга мажбур бўлган. Ҳозиргача барча маблағлар тўлиқ ундирилиб, ишчиларнинг банк карталарига ўтказиб берилган.
«Меҳнат ҳақини тўламаслик – ишчи-ходимнинг асосий ҳуқуқини бузишдир. Ҳеч ким бу ҳуқуқни поймол қилишга ҳақли эмас»,- деди Ихтиёр Олимов.
