Бухорода ўзи ва икки фарзандини каналга ташлаган 22 ёшли аёлга нисбатан суд ҳукми ўқилди.
Аниқланишича, 2003 йилда туғилган Бухоро психология ва хорижий тиллар университети талабаси Мафтуна Нурматова (исм шарифлар ўзгартирилган) Тошкент вилоятида яшаган Ином Тиллаволдиев билан шаръий никоҳ асосида турмуш қурган. Айрим сабабларга кўра, ҳодиса юз берган вақтда Ромитан туманидаги ота-онасининг уйида яшаган.
Жорий йилнинг 8 март куни Мафтуна кўчада кетаётганида қўшниларидан бири унга турмуш ўртоғи бошқа аёлга уйланмоқчи бўлаётгани ва Қуйи Чирчиқдаги уйини сотмоқчи экани ҳақида маълумотни айтади. Эрининг ҳаракатларидан ғазабланган аёл 9 март куни уйдан икки фарзанди — 2021 йилда туғилган Мақсуд ҳамда 2023 йилда туғилган Мустафоларни олиб, ота-онаси ва бошқа яқинларига гўё турмуш ўртоғи олдига кетишини айтиб, чиқиб кетади.
Аммо белгиланган манзилга эмас, аксинча Бухоро тумани “Боғикалон” маҳалласидан оқиб ўтувчи Ғозиобод каналига бориб, ўзи ва фарзандларини ўлдириш мақсадида сувга ташлаб юборган. Бироқ канал яқинида бўлган фуқаролар ҳушсиз ҳолда оқиб келаётган Мақсудни қутқариб қолишган. Шу вақтда Мафтунада оналик ҳисси уйғониб, ўзи ва иккинчи фарзандини бошқалар ёрдамида қутқаришга ҳаракат қилган.
Экспертиза хулосаларига кўра, болалар нафас етишмовчилиги ва аспирацион синдром билан оғир ҳолатда Бухоро туман тиббиёт бирлашмасига етказилган ҳамда ўз вақтида кўрсатилган тиббий ёрдам туфайли уларнинг ҳаёти сақлаб қолинган.
Суд ҳукми билан Мафтуна Нурматова Жиноят кодексининг 25 (жиноятга суиқасд) ва 97-моддалари 2-қисми “а, в” бандлари (айбдорга аён бўлган ожиз аҳволдаги шахсни қасддан ўлдириш) бўйича айбли деб топилиб, унга нисбатан 4 йил озодликдан маҳрум этиш жазоси тайинланган.
