Шавкат Мирзиёевнинг Москва шаҳрига амалий ташрифи якунланди. Бу ҳақда президент матбуот хизмати хабар қилди.
Давлат раҳбари Иккинчи жаҳон урушидаги Ғалабанинг 81 йиллигига бағишланган тантанали тадбирларда иштирок этди.
Қизил майдонда бўлиб ўтган Ғалаба парадида Беларусь президенти Александр Лукашенко, Қозоғистон президенти Қосим-Жўмарт Тўқаев, Лаос президенти Тхонглун Сисулит, Малайзия подшоҳи Султон Иброҳим, Словакия бош вазири Роберт Фицо ҳамда бошқа хорижий делегациялар раҳбарлари қатнашган.
Шу билан бирга, Россия президенти Владимир Путин билан учрашув бўлиб ўтди. Учрашувда товар айирбошлаш суръатини сақлаб қолиш ва устувор тармоқларда кооперация лойиҳаларини жадаллаштиришга қаратилган мувофиқлаштирилган чора-тадбирларни қабул қилиш, шунингдек, ҳудудлар даражасида фаол алоқаларни давом эттириш муҳимлиги таъкидланган.
Тадбирлар якунлангач, Шавкат Мирзиёев Тошкентга жўнаб кетди. “Внуково” халқаро аэропортида олий мартабали меҳмонни Россия расмийлари кузатиб қўйди.
