Украина президенти Владимир Зеленский икки фармонни имзолаб, Миллий хавфсизлик ва мудофаа кенгашининг Европа Иттифоқи санкциялари билан мувофиқлаштириш тўғрисидаги қарорини кучга киритди. Бу ҳақда Украина президенти девони хабар берди.
Расмий баёнотга кўра, Европа Иттифоқининг 20-санкция пакети доирасида амалга оширилган мувофиқлаштириш 120 нафар шахс ва ташкилотни қамраб олади ҳамда Россия иқтисодиётининг асосий тармоқларига қаратилган иқтисодий чекловларни ўз ичига олади.
Янги санкциялар Россия, Беларусь, БАА, Қирғизистон, Қозоғистон, Ўзбекистон ҳамда Россия томонидан босиб олинган ҳудудларда бўлган жами 16 нафар фуқаро ва 31 компанияни қамраб олади. Шунингдек, Эроннинг 19 фуқароси ва 11 компанияси ҳам санкциялар рўйхатига киритилган.
Санкциялар рўйхатига Россиянинг стратегик корхоналари раҳбарлари, бюджет муассасалари вакиллари, армиянинг айрим бўлинмалари ҳамда вақтинча босиб олинган ҳудудларда Россия манфаатларига хизмат қилаётган шахслар киритилган.
Шунингдек, рўйхатдан Россия ҳарбий-саноат мажмуаси корхоналари, радиоэлектрон кураш тизимлари, дронлар учун дастурий таъминот ва эҳтиёт қисмлар ишлаб чиқарувчилари, нефть, газ ва олтин қазиб олиш компаниялари ҳам ўрин олган. Хусусан, аэрокосмик маҳсулотлар ва дрон компонентлари ишлаб чиқарувчи “Атлант Аэро” ҳамда алоқа тизимлари ва БПЛАлар учун қисмлар тайёрловчи “ИРЗ-Связ” компанияларига чекловлар жорий этилган.
Бундан ташқари, БААдаги айрим компаниялар ҳам санкцияларга тушган. Улар орасида дастгоҳлар, лаборатория ускуналари, кимёвий маҳсулотлар ҳамда тижорий самолётлар учун эҳтиёт қисмлар етказиб берувчи компаниялар бор. Шунингдек, Беларусьдаги нефть экспортчиси ҳам чекловларга учраган.
Украина шунингдек, уч россиялик шахс — прокурор Людмила Баландина, судья Дмитрий Гордеев ва тарғиботчи Мария Ситтелга ҳам санкциялар қўллади. Улар Украина тарафдорларига нисбатан репрессия ҳамда дезинформация тарқатишда айбланган.
Эроннинг 19 фуқароси ва 11 компанияси ҳам санкциялар рўйхатига киритилган. Улар Эроннинг баллистик ракеталар ва дронлар ишлаб чиқариш дастурлари билан боғлиқ фаолият юритади.
Украина президентининг санкциялар сиёсати бўйича вакили Владислав Власюкнинг айтишича, Киев Европа Иттифоқи ва ҳамкорлар билан санкцияларни уйғунлаштиришни давом эттирмоқда ҳамда Россия ва унга ёрдам бераётганларга босимни кучайтиришни режалаштирмоқда. Шунингдек, у Европа Иттифоқи билан 21-санкция пакети устида ҳам иш олиб борилаётганини билдирган.
