Қозоғистон Молиявий мониторинг агентлиги 26 ёшли Беларусь фуқароси Андрей Бурим – Mellstroy тахаллуси билан машҳур блогерни қидирувга берди. Бу ҳақда Қозоғистон Бош прокуратураси махсус статистик ва ҳуқуқий ҳисоблар порталига таяниб, “Kazinform” хабар берди.
Нашрга кўра, қидирув 15 ноябрь куни Остона шаҳрида рўйхатга олинган ва уни Молиявий мониторинг агентлигининг шаҳар бўйича иқтисодий терговлар бўлими олиб бормоқда. Қидирув сабабларининг тафсилоти ошкор қилинмаган.
2024 йил февралида блогер Россия ҳудудида ҳам қидирувга берилган эди. Унинг ота юртида, Беларусда, хизматдан бўйин товлаш бўйича жиноят иши очилган.
2025 йил ноябрь бошида Беларусда Mellstroy’нинг барча платформалардаги каналлари, логотиплари ва белгилари экстремистик деб топилган. Ҳуқуқни муҳофаза қилувчи органларнинг аниқлашича, Бурим интернетда одамларни ноқонуний ҳаракатларни видеога олишга чақирган ва бунинг эвазига мукофот берган. Шу сабабли 2025 йилнинг октябрь ойида Беларусда безорилик ва жамоат тартибини бузиш ҳолатлари қайд этилган.
Mellstroy хавфли ва ҳайратланарли чиқишлари билан машҳур бўлиб, у томошабинлардан донат олади. 2020 йилнинг октябрида у жонли эфирда модель Алена Ефремовани ургани учун ярим йил жазо ишлари ва компенсация тўлашга мажбур бўлган.
