Украина Президенти Владимир Зеленский “Энергоатом” компаниясидаги коррупция иши ортидан Адлия вазири Герман Галушенко ва Энергетика вазири Светлана Гринчукни лавозимидан озод этишни сўради. Бу ҳақда Зеленский ўзининг Telegram-каналида ёзиб қолдирди.
Президент бу масалани “ишонч масаласи” деб атаб, Бош вазир Юлия Свириденкога уларнинг истеъфоси ҳақидаги ҳужжатларни тайёрлашни топширган.
Зеленский парламент депутатларидан бу қарорни қўллаб-қувватлашни сўраган.
“Агар айбловлар бўлса, уларга жавоб бериш керак. Энди ҳаммаси қонуний йўл билан ҳал қилинади”, деган Зеленский.
Давлат раҳбари, шунингдек, “Энергоатом” иши доирасида тилга олинган икки шахсга нисбатан санкциялар киритилишини маълум қилган. Кейинчалик Бош вазир Свириденко бу шахслар Темур Миндич ва Александр Цукерман эканини тасдиқлаган. Улар терговлар бошланишидан сал олдин мамлакатни тарк этган.
Светлана Гринчук ўзининг истеъфо аризасини Facebook саҳифасида эълон қилиб, “менинг фаолиятим давомида ҳеч қандай қонун бузилиши бўлмаган”, дея изоҳ қолдирди. Герман Галушенко ҳам истеъфо аризасини ёзганини Бош вазир тасдиқлаган.
Иккала вазир ҳам лавозимга 2025 йилнинг июль ойида тайинланган эди. Галушенко илгари Энергетика вазири, Гринчук эса Экология вазири сифатида ишлаган.
