Кеча, 22 июнь куни Ўзбекистонга икки қоп психотроп дорини олиб ўтишга уринган қирғизистонлик шахс қўлга олинди. Бу ҳақда Қирғизистон Республикаси Давлат чегара хизмати хабар берди.
Қайд этилишича, Боткен вилояти Қадамжой туманининг Доочар ҳудудида давлат чегара чизиғидан тахминан 100 метр узоқликда чегара патрули Қирғизистон Республикаси фуқароси, Айрибоз қишлоғида яшовчи 2000 йилда туғилган К.Ж. ни қўлга олган.
Ушбу шахс Daewoo Tico автомобилида Қирғизистон Республикасидан Ўзбекистон Республикасига кучли таъсир қилувчи препаратлар сирасига кирувчи икки қоп “Тропикамид” дори воситасини ноқонуний олиб ўтишга уринган.
У ушлангандан сўнг чегара патруллари Доочар йўналишидаги атроф-муҳитни кўздан кечирган ва ушбу ноқонуний фаолиятга алоқадор шахслар томонидан ишлатилган деб тахмин қилинаётган скутерни топган. Мусодара қилинган дори воситаларининг умумий сони 1 минг 898 тани ташкил этган. Юкнинг дастлабки қиймати 2,8 миллион қирғиз сомидан ортиқ (тақрибан 384 млн сўм) деб баҳоланмоқда.
Билдирилишича, мазкур ҳолат юзасидан зарур текширув тадбирлари олиб борилмоқда. Тегишли ҳужжатлар расмийлаштирилгандан сўнг қўлга олинган фуқаро ва мусодара қилинган юк кейинги суриштирув ишлари учун ваколатли органларга топширилган.
