Аввалроқ, Туркия футбол федерацияси (ТФФ) президенти Иброҳим Ҳожиосманўғли ҳакамлар орасида кенг кўламли ўйинларга пул тикиш фаолияти аниқланганини маълум қилинган эди. Энди эса федерацияси ушбу фаолиятда 149 нафар ҳакам ва ёрдамчи ҳакамни айбдор деб топди ва уларнинг фаолиятини тўхтатди. Бу ҳақда “Turkish minute” нашри хабар берди.
Федерация тартиб-интизом кенгаши ушбу шахсларга 8 ойдан 12 ойгача бўлган муддатга чеклов жазосини тайинлаган. Яна уч нафар ҳакамга нисбатан эса тергов ишлари давом этмоқда. ТФФ ўз расмий сайтида жазоланган ҳакамларнинг тўлиқ рўйхатини эълон қилиб, жазо қилмишнинг жиддийлик даражасига қараб белгилангани ҳақида маълум қилган.
Иброҳим Ҳажиосмонўғлининг сўзларига кўра, текширувлар давомида мамлакат профессионал лигаларида фаолият юритаётган 571 нафар ҳакамдан 371 нафарининг қиморга пул тикиш ҳисоблари аниқланган, улардан 152 нафари фаол равишда қимор ўйнаган. Унинг айтишича, айрим ҳакамлар жуда катта миқдорда пул тиккан, масалан биттаси 18 227 марта, 42 нафари эса 1000 дан ортиқ маротаба гаров ўйнаган. Бошқалари эса фақат бир неча бор бунда иштирок этган.
