Швейцарияда аҳоли сонини 10 миллион киши билан чеклаш бўйича референдум ўтказилади. Бу ҳақда CNN хабар берди.
Таклиф мамлакатдаги энг йирик сиёсий куч — Швейцария халқ партияси (SVP) томонидан илгари сурилган. Ҳозирда мамлакат аҳолиси 9,1 миллион кишини ташкил этади.
Агар 14 июнь куни бўлиб ўтадиган референдум маъқулланса, аҳоли сони 9,5 миллионга етгач, ҳукумат бошпана сўровчилар ҳамда чет эллик резидентларнинг оила аъзоларини қабул қилишни тўхтатиши керак бўлади. Аҳоли 10 миллионга етган тақдирда эса, ҳукумат Швейцариянинг энг йирик савдо ҳамкори бўлган Европа Иттифоқи (ЕИ) билан эркин ҳаракатланиш тўғрисидаги келишувни бекор қилишга мажбур бўлади.
Швейцария Европа Иттифоқига аъзо эмас, бироқ мамлакат 120 дан ортиқ икки томонлама келишувлар орқали иттифоқ билан интеграциялашган. Ушбу битимлар Швейцарияга Европа Иттифоқининг ягона бозорига кириш ҳамда одамлар ва товарларнинг эркин ҳаракатланишига имкон беради.
1999 йилдан буён барча сайловларда биринчи ўринни эгаллаб келаётган SVP Швейцарияда “аҳоли портлаши” кузатилаётганини, бу эса давлат хизматларига босим ўтказаётгани, инфратузилмани зўриқтираётгани ва ижара нархларини ошираётганини таъкидламоқда.
Бироқ етти аъзодан иборат Федерал кенгаш партия ташаббусини қўллаб-қувватламаган ва кўпчилик овоз билан унга қарши чиққан. Аммо 2025 йили Швейцариянинг Leewas овоз бериш бюроси томонидан ўтказилган сўровда таклиф кенг қўллаб-қувватланган. Швейцариянинг референдум тизимига кўра, агар ташаббус 18 ой ичида камида 100 минг сайловчининг имзосини тўпласа, у умумхалқ овозига қўйилади.
