Бухоро вилояти ИИБ кибержиноятларга қарши курашиш ходимлари фуқароларнинг банк карталаридан пулларни ўғирлаш билан шуғулланган жиноий гуруҳ фаолиятига чек қўйди.
Дастлабки терговга кўра, республика бўйлаб содир этилган ушбу жиноятлар ортида Самарқанд вилоятида яшовчи 20 ёшга тўлмаган йигит ва унинг турли ҳудудлардаги шериклари тургани аниқланган.
Гумонланувчилар қўлга олинганда улардан ўнлаб банк карталари, SIM карталар ҳамда махсус мобил қурилмалар ашёвий далил сифатида расмийлаштириб олинган. Тергов органлари бу буюмлар гуруҳ узоқ вақт давомида йирик миқёсдаги киберўғриликлар билан шуғулланганини тасдиқлашини маълум қилди.
ИИБ маълумотига кўра, гумонланувчилар Telegram орқали бошқарилган яширин аккаунтлардан фойдаланиб, фуқароларнинг телефонларига зарарли APK файлларни юборган.
Ушбу дастурлар мобил телефонга ўрнатилгач, банк иловаларига оид маълумотлар ҳамда пул ўтказмаларини тасдиқлаш учун юбориладиган SMS кодлар жиноятчилар назоратига ўтган. Шундан сўнг улар жабрланувчиларнинг банк карталаридаги маблағларни ўзлаштириб олган.
Талон-торож қилинган пулларнинг изини яшириш мақсадида маблағлар бегона шахслар номига расмийлаштирилган кўплаб транзит банк карталари ва сохта аккаунтлар орқали тезкор равишда бошқа ҳисоб рақамларига ўтказилган.
Мазкур жиноий схема оқибатида республиканинг турли ҳудудларида 60 нафардан ортиқ фуқаро жабрланган. Ҳолат юзасидан гумонланувчига нисбатан Жиноят кодексининг 169-моддаси учинчи қисми “б” банди (ўғрилик) билан жиноят иши қўзғатилган.
Ҳозирда дастлабки тергов ҳаракатлари давом эттирилмоқда. Шунингдек, ушбу жиноий гуруҳга алоқадор бўлган бошқа шахсларни аниқлаш, уларни жавобгарликка тортиш ҳамда жабрланган фуқароларнинг ҳуқуқларини тиклаш бўйича чоралар кўрилмоқда.
