Покистон собиқ бош вазири Имрон Хоннинг ўғли Қосим Хон БМТдан отасининг қамоқдан озод қилиш учун вазиятга аралашишни сўради. У отасининг қамоқхонада қийноқларга солинаётганини даъво қилди. Бу ҳақда The Independent хабар берди.
БМТ Инсон ҳуқуқлари кенгашида сўзга чиққан Қосим Хон отаси қарийб минг кундан бери панжара ортида, ўлимга ҳукм қилинган маҳбуслар учун мўлжалланган бир кишилик камерада сақланаётганини айтди.
More stories“Мен Покистонда тоқацизлик ва таъқибларнинг хавотирли даражада ортиб бораётганидан чуқур ташвишдаман. Биз аҳолининг муайян қатламларини инсонийликдан маҳрум қилиш ва овозини ўчиришга қаратилган тизимли кампанияга гувоҳ бўлмоқдамиз”, деди Қосим Хон.
Унинг сўзларига кўра, у отасини уч йилдан ортиқ вақтдан бери кўрмаган. Қосим Хон буни шунчаки эътиборсизлик эмас, балки инсоннинг қадр-қимматини камситишга қаратилган қасддан қилинган таъқиб деб баҳолади.
Қосим Хоннинг Европа Иттифоқи билан савдо имтиёзлари (GSP+) кўрилаётган тадбирдаги чиқиши Покистонда катта сиёсий можарога сабаб бўлди. Мудофаа вазири Хавожа Асиф Имрон Хоннинг ўғилларини халқаро миқёсда Покистонга қарши тарғибот олиб боришда ва мамлакатни савдо имтиёзларидан маҳрум қилишга ҳаракат қилаётганликда айблади.
“Агар ўғиллари отаси ҳақида шунчалик қайғураётган бўлса, GSP+ мақомини бекор қилишга уриниш ўрнига, ўз муҳаббати ва садоқатини кўрсатиб Покистонга келиб, уни кўришсин”, деб ёзди Хавожа Асиф ижтимоий тармоқларда.
Маълумот учун, GSP+ мақоми 2014 йилда берилган бўлиб, у Покистоннинг Европа Иттифоқига тўқимачилик экспортини 108 фоизга оширишга ёрдам берган. Ҳозирги тўрт йиллик цикл 2027 йилгача давом этади, бироқ унинг узайтирилиши инсон ҳуқуқлари ва сиёсий эркинликлар кўригидан сўнг амалга оширилади.
73 ёшли Имрон Хон 2023 йил август ойидан бери қамоқда. У коррупция ва давлат сирларини ошкор қилишда айбланиб, бир неча бор узоқ муддатли қамоқ жазоларига ҳукм қилинган.
