АҚШни 31 декабргача ўз ихтиёри билан тарк этадиган ноқонуний мигрантларга бериладиган тўлов 3 минг долларгача оширилади. Бу ҳақда мамлакат ички хавфсизлик вазири Кристи Ноэм маълум қилди.
АҚШни мустақил равишда тарк этишни танлаган ноқонуний мигрантлар ҳибсга олинмайди. Шунингдек, улар келажакда Қўшма Штатларга қонуний асосда кириш имкониятини сақлаб қолади. Бунинг учун мигрантлар CBP Home иловаси орқали депортация жараёнини мустақил равишда ташкиллаштиради.
Ватанига қайтгани тасдиқланган шахсларга 1 минг доллар тўлаб келинаётган эди. Октябрь ойигача 1,6 миллион мигрант шу тартибда АҚШни тарк этган. Эндиликда эса янги йилга қадар тўлов миқдори 3 минг долларга оширилади.
“Ноқонуний муҳожирлар бу совғадан фойдаланиши ва ўзларини депортация қилиши керак, акс ҳолда биз уларни топамиз, ҳибсга оламиз ва улар ҳеч қачон қайтиб кела олмайди”, деди Кристи Ноэм.
Ҳозирда АҚШда ноқонуний муҳожирни аниқлаш, ҳибсга олиш ва мамлакатдан чиқариб юборишнинг ўртача қиймати 17 минг долларни ташкил этади. Шу боис “ўзини депортация қилиш” ҳукумат учун муқобил ва иқтисодий жиҳатдан мақбул вариант сифатида баҳоланмоқда.
