Андижон вилояти Балиқчи тумани Фавқулодда вазиятлар бўлими инспектори пора олаётганида қўлга тушди. Бу ҳақда Давлат хавфсизлик хизмати хабар берди.
Ходим хизмат мавқеидан фойдаланган ҳолда ўзганинг ишончига кирган ва мансабдор танишлари орқали унинг қариндошини мазкур соҳага ишга киритиб қўйиш эвазига 1800 АҚШ доллари талаб қилган. Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда инспектор сўралган пул маблағини тумандаги умумий овқатланиш шохобчаларидан бирида олган вақтида ашёвий далиллар билан ушланган.
Ҳозирда унга нисбатан Жиноят кодексининг 168-моддаси (фирибгарлик) 3-қисми “в” банди ва 28,211-моддаси (пора бериш) 1-қисми билан жиноят иши қўзғатилиб, тергов ҳаракатлари олиб борилмоқда.
Жиноят кодексига кўра, хизмат мавқеидан фойдаланган ҳолда фирибгарлик қилиш БҲМнинг 300 бараваридан 400 бараваригача миқдорда жарима ёки 2 йилдан 3 йилгача ахлоқ тузатиш ишлари ёхуд муайян ҳуқуқдан маҳрум этилган ҳолда 5 йилдан 8 йилгача озодликдан маҳрум қилиш билан жазоланади.
Ўзбекистонда коррупцияга қарши курашиш бўйича 2026-йилда “фавқулодда ҳолат” эълон қилинган. Давлат хавфсизлик хизмати хабарида таъкидланишича, бунинг ортидан ҳуқуқни муҳофаза қилувчи органлар томонидан мунтазам равишда тезкор тадбирлар ўтказилмоқда.
