Гулистон шаҳрида жойлашган ошхонада газ портлагани ортидан бир киши қамоққа олинди. Бу ҳақда Сирдарё вилояти ИИБ матбуот хизмати хабар берди.
Воқеа 2 декабрь куни соат 10:49 да “Тараққиёт” МФЙда жойлашган бозордаги овқатланиш шохобчасида содир бўлганди. Ижтимоий тармоқларда ҳодиса оқибатида қурбонлар борлиги ҳақида хабарлар тарқалди. Сирдарё вилояти Соғлиқни сақлаш бошқармаси 2 декабрь кунги ахборотида вафот этганлар йўқлигини билдирганди.
Сирдарё вилояти ИИБ матбуот хизматининг 3 декабрдаги хабарида маълум қилинишича, ҳолат юзасидан Жиноят кодексининг 257-моддаси 2-қисми (меҳнатни муҳофаза қилиш қоидаларини бузиш одам ўлишига ёки бошқа оғир оқибатлар келиб чиқишига сабаб бўлиши) билан жиноят иши қўзғатилган. ИИБ вафот этганлар бор-йўқлигига аниқлик киритмаган. Ҳозирда иш юзасидан тергов ҳаракатлари давом этмоқда.
