АҚШнинг Лас-Вегас шаҳридаги “Т-Mobile” аренада ўтказилган UFC 323 турнирида Ўзбекистон шарафини ҳимоя қилувчи ярим оғир вазн тоифасидаги жангчи Богдан Гусков рейтингда ўзидан юқорида турган полшалик рақиби, собиқ чемпион Ян Блаховичга қарши баҳс олиб борди. Беллашув ҳакамлар қарорига кўра дуранг билан якунланди.
Гусков жангни фаол бошлади ва рақибига бир неча бор кучли зарбалар йўллади. Биринчи раунд асосан иккала жангчининг зарбалар алмашинуви билан ўтди. Иккинчи раундда ўзбекистонлик спортчи рақибини нокдаун ҳолатига туширди ва партерда устунликка эришди. Учинчи раундда эса Блахович кўпроқ аниқ зарбалар йўллади. Раунд охирида Гусков мувозанатини йўқотди, бироқ жангни давом эттиришга муваффақ бўлди.
Шу тариқа ҳакамлар баҳсни дуранг, деб баҳолашди.
Маълумот учун, Богдан Гусков UFC промоушени доирасида 6 та жанг ўтказди. Улардан 4 тасида ғалаба қозонган, 1 баҳсда мағлуб бўлган ва бугун дуранг натижа қайд этди.
