Жанубий Корея президенти Ли Же Мёнг олинган маблағларни соғлиқни сақлаш эҳтиёжларига сарфлаш мақсадида таркибида шакар миқдори юқори бўлган маҳсулотларга акциз солиғини жорий этишни таклиф қилди. Бу ҳақда Ли Же Мёнг X ижтимоий тармоғида ёзиб қолдирган.
“Сигаретлар билан бўлгани каби йиғим орқали шакар истеъмолини чеклаш ва олинган маблағларни минтақавий ва жамоат саломатлигини мустаҳкамлашга сарфлаш ҳақида фикрингиз қандай?”, дея ўз ёзувига ушбу мавзудаги ижтимоий сўровнома натижалари чоп этилган мақолага ҳавола илова қилган.
“Сеул газетаси”да эълон қилинган тадқиқотга кўра, жанубий кореяликларнинг 80 фоизи таркибида шакар миқдори юқори бўлган маҳсулотлар ишлаб чиқарувчи компанияларга йиғим жорий этиш таклифини қўллаб-қувватлаган. Шу билан бирга, респондентларнинг 75 фоизи газланган ичимликлардан йиғим ундирилиши керак деб ҳисобласа, 72 фоизи пишириқлар ва қандолат маҳсулотларини тилга олган. Сўралганларнинг 94,4 фоизи товарлар қадоғига шакарнинг зарарли таъсири ҳақида махсус огоҳлантириш қўйиш ғоясини маъқуллаган.
Бир минг ўттиз киши ўртасида ўтказилган сўровни Сеул миллий университети қошидаги Саломатлик маданияти тадқиқот ташкилоти амалга оширган.
Маълумотларга кўра, дунёнинг 120 га яқин мамлакати таркибида шакар миқдори юқори бўлган маҳсулотларга нисбатан махсус солиқлар жорий этган ёки бошқа чоралар кўрган. 2018 йилда Буюк Британия газланган ичимликлар ишлаб чиқарувчилардан йиғим ундира бошлаганди. Натижада уларнинг таркибидаги шакар миқдори 47 фоизга камайди.
