Навоий вилоятининг Қизилтепа туманида ов қуроллари билан қуролланган бир гуруҳ браконьерлар вилоят экология бошқармаси тезкор гуруҳи ходими И.X.га куч ишлатди. Бу ҳақда Расул Кушербаев хабар берди.
Унинг ёзишича, ноқонуний ов билан шуғулланган браконьерлар экология инспекторининг қонуний талабларига бўйсунмагани ҳолда ўзларига ёрдам учун Бухоро вилоятидан “кўча мафияси”дан иборат гуруҳ чақириб, улар ёрдамида қочиб кетишга эришган.
Навоий вилояти ИИБ матбуот хизмати ҳолатни тасдиқлади. Воқеа туман ўрганилган ва фуқароларнинг шахси аниқланиб туман ИИБга олиб келинган. Суриштирув жараёнида маълум бўлишича, Қизилтепа тумани Тўдакўл сув ҳавзаси ҳудудига ов қилиш учун келган бухоролик 5 нафар фуқаро шу ҳудудда ўз хизмат вазифасини ўтаётган экология бошқармаси ходими И.X.нинг қонуний талабига бўйсунмай, унга нисбатан куч ишлатган.
Ўрганишлар натижасида автомашина юкхонаси кўздан кечирилганда битта ёввойи қуён, иккита ёввойи ўрдак ҳамда сақлаш учун рухсатномаси бор 4 та ов қуроли мавжудлиги аниқланган.
Айни пайтда ҳолат юзасидан Қизилтепа тумани ИИБ томонидан барча тегишли экспертизалар тайинланиб, терговга қадар текширув ҳаракатлари олиб борилмоқда.
