Польшада оғир моддий ва соғлиқ билан боғлиқ муаммоларга дуч келган бир гуруҳ Ўзбекистон фуқаролари элчихона ва Миграция агентлиги ҳамкорлигида ватанга қайтарилди. Бу ҳақда “Дунё” хабар берди.
Маълум қилинишича, айрим ватандошлар ҳужжатларини йўқотгани сабаб ишга жойлаша олмаган, бошқалари эса меҳнат фаолияти давомида оғир хасталикка чалинган.
Хусусан, ҳужжатларини йўқотиб, оғир молиявий аҳволга тушиб қолган хоразмлик Й.А. полиция томонидан ушланганидан сўнг, унга консуллик-ҳуқуқий ёрдам кўрсатилиб, вақтинчалик қайтиш сертификати ва авиачипта расмийлаштирилди ҳамда Ўзбекистонга қайтарилди. Ҳужжатлари ўғирланган қашқадарёлик фуқаронинг ҳам ватанга қайтиши таъминланди.
Шунингдек, Лодз воеводалигининг Велюн шаҳрида юрак хуружи оқибатида вафот этган наманганлик фуқаронинг жасади Миграция агентлиги билан ҳамкорликда Ўзбекистонга олиб келинди.
Эстониянинг Тарту шаҳрида хизмат сафари чоғида инсультга учраган тошкентлик З.М. эса Ўзбекистоннинг Польша ва Латвиядаги элчихоналари, Миграция агентлиги ҳамда Uzbekistan Airways авиакомпанияси кўмагида махсус тиббий жиҳозлар ва шифокорлар кузатувида Рига—Тошкент рейси орқали ватанга олиб келиниб, шифохонага жойлаштирилди.
Бундан ташқари, иш жойидаги бахтсиз ҳодиса оқибатида оёғи синган андижонлик Т.И. ҳамда мия чайқалиши билан касалхонага ётқизилган наманганлик Н.А.га зарур тиббий ва амалий ёрдам кўрсатилди. Элчихона дипломатлари фуқароларнинг яшаш ва меҳнат шароитларини жойига чиқиб ўрганиш орқали бундай муаммоларни тизимли ҳал этиш чораларини кўрмоқда.
