Латвия Украинага 42 та зирҳли транспорт воситасини топширди. Улар тез орада Украина махсус операциялар кучларига юборилади. Бу ҳақда Украина Мудофаа вазирлигига таяниб, Anadolu хабар берди.
Икки давлат расмийлари ортасидаги учрашув 5 ноябрь куни Рига яқинидаги Адажи ҳарбий базасида бўлиб ўтган. Украина мудофаа вазири Денис Шмигалга кўра, Украина 2025-йилгача мўлжалланган ҳарбий ёрдам дастури доирасида Латвиядан ваъда қилинган барча 42 та зирҳли техникани олган.
Рига Киевга 12 та Патриа 6х6 туридаги зирҳли транспорт воситасини топширган, ПУРЛ ташаббусига қўшимча 2,2 миллион евро ажратган ва Шелтер коалициясига молиявий ёрдам кўрсатган.
Украина Мудофаа вазири Денис Шмигал Латвия НАТОнинг “Реноватор” лойиҳасида иштирок этаётганини алоҳида таъкидлаган. Бу лойиҳа доирасида Украинадаги бешта ҳарбий реабилитация маркази қайта тикланади. У Латвия ҳукумати ва халқига Украинага қатъий ва изчил ёрдам учун миннатдорчилик билдирган.
Латвия мудофаа вазири Андрис Спрудс эса шундай деган:
“Латвияда ишлаб чиқарилган зирҳли техникалар Украинага катта ёрдам бўлади. Бу уларнинг ҳақиқий жанг шароитидаги мустаҳкамлигини синовдан ўтказиш имконини беради”.
Уруш бошланганидан бери Латвия Украинага кенг кўламли ёрдам кўрсатиб келмоқда. Мамлакатнинг умумий ёрдами 890 миллион евродан ошган. Бундан ташқари, Рига ва Киев ўртасида ўн йиллик хавфсизлик битими имзоланган. Унга кўра, Латвия ҳар йили ҳарбий ёрдам кўрсатади, киберхавфсизлик, мина тозалаш, дрон технологиялари соҳаларида ҳамкорлик қилади ҳамда Украинанинг НАТО ва Европа Иттифоқига қўшилиш жараёнини қўллаб-қувватлайди.
