Европа Иттифоқи етакчилари 2026–2027-йилларда Украинага 90 миллиард евро миқдорида фоизсиз кредит ажратишга келишиб олди. Бу ҳақда Европа кенгаши раҳбари Антониу Коштага таяниб, Reuters хабар берди.
Европалик етакчилар Россиянинг музлатилган активларидан фойдаланиш ўрнига кредит ажратиш вариантини танлаган. Украинанинг Россияга қарши мудофаасини молиялаштириш учун маблағлар капитал бозорларидан қарз олиш механизми орқали жалб қилинади. Ушбу схемада Чехия, Венгрия ва Словакия иштирок этмайди. Кредитни молиялаштириш жараёнида Европа Иттифоқи Россиянинг музлатилган нақд активларидан фойдаланиш ҳуқуқини ўзида сақлаб қолади.
“Украинани 2027-йилдан кейин молиялаштириш Европа Иттифоқи бюджетининг навбатдаги узоқ муддатли муҳокамасининг бир қисми бўлади”, деди Еврокомиссия президенти Урсула фон дер Ляйен.
Германия канцлери Фридрих Мерц Украинага ажратилаётган маблағ фоизсиз кредит эканини таъкидлади. Унинг сўзларига кўра, Украина ушбу кредитни фақат Россия товон пули тўлаганидан кейингина қайтаради.
“Россия Украинага етказилган зарарни қопламагунча, биз Россия активларини музлатиб қўямиз”, — деди канцлер.
Маблағлар Украинага 2026-йилнинг иккинчи чорагидан бошлаб етказила бошлайди. Президент Владимир Зеленский Европа Иттифоқи етакчиларига қабул қилинган қарор учун миннатдорлик билдирди.
“Бу ҳақиқатан ҳам барқарорлигимизни мустаҳкамлайдиган катта ёрдам. Муҳими, Россия активлари ҳаракациз қолмоқда ва Украина келгуси йиллар учун молиявий хавфсизлик кафолатини олди”, деди у.
