Украина Иорданиядаги АҚШ ҳарбий базаларини ҳимоя қилиш учун дронлар ва уларни бошқариш бўйича экспертлар гуруҳини юборди. Бу ҳақда Украина президенти Владимир Зеленский The New York Times газетасига берган интервьюсида маʻлум қилди.
Зеленский Қўшма Штатлар 5 март куни шундай ёрдам сўраб мурожаат қилгани ва эртаси куниёқ ёрдам жўнатилганини айтди.
Биз сўровга дарҳол муносабат билдирдик, Мен “ҳа, албатта, биз ўз мутахассисларимизни юборамиз”, деб жавоб бердим, деди Украина президенти.
АҚШ ва Исроилнинг Эронга қарши уруши дунё эътиборини Украинадаги урушдан чалғитиши мумкин. Бироқ бу вазият Киев учун ўзининг уруш давомида орттирган тажрибаси ва илғор технологияларини бошқа урушда қўллаш имкониятини ҳам яратди.
Зеленский 8 март куни украиналик мутахассислар ҳали Яқин Шарққа ерга етиб бормагани, тез орада манзилда бўлишини айтди.
“Ҳозир тафсилотлар ҳақида гапиришга эрта. Келаси ҳафта мутахассислар жойига бориб вазиятни кўради ва ёрдам беради, чунки улар ёрдам кўрсатиш мақсадида бормоқда. Шундан кейин келгуси қадамлар бўйича ҳаракат қиламиз. Аввало учрашувларнинг дастлабки натижаларини кутиш керак”, деди у.
Украина президенти NYT’га берган интервьюсида Эроннинг биринчи зарбаларидан кейинги кунларда унга Баҳрайн, БАА, Иордания, Кувайт, Қатар ва Саудия Арабистони раҳбарлари ёрдам сўраб мурожаат қилганини айтди.
Зеленский бу давлатларга ёрдам беришни хоҳлашини, бироқ ёрдам ҳажмини доимий равишда Украинанинг эҳтиёжлари билан таққослаш кераклигини таъкидлади. Шунингдек, Москва билан дўстона муносабатда бўлган Яқин Шарқ давлатларини Владимир Путинга таъсир ўтказишга чақирди.
Мен шундай дедим: “Қулоқ солинг, балки улар россияликлар билан гаплашар ва улар пауза қилар. Бундай ҳолатда, албатта, биз Яқин Шарққа ўзини ҳимоя қилишда ёрдам бера оламиз, деди Зеленский.
Февраль ойида Россия Украина аҳоли пунктларига 5000 га яқин зарба берувчи дронларни учирди, Украина уларнинг қарийб 87 фоизини уриб туширишга муваффақ бўлди.
“Эрондан оммавий равишда олиб келинаётган узоқ масофали дронларга қарши кураш ҳақида Украинадан кўра кўпроқ биладиган ҳеч бир давлат йўқ”, дея таъкидлайди The New York Times.
NYT нашрининг аниқлик киритишича, Эроннинг Shahed дронини ишлаб чиқариш 50 минг долларгача, Патриот ҳаво мудофаа тизими учун тутиб олувчи ракетани ишлаб чиқариш эса 3 миллион долларга тушади, бу эса тахминан 60 баравар қиммат.
“Россия босқинидан кўп ўтмай, Украина Shahed дронларини йўқ қилиш учун баъзан қиммат ракеталардан фойдаланган. Бироқ тез орада бу усул мақсадга мувофиқ эмаслиги аён бўлди”, деб ёзади NYT газетаси.
