Демократ партияси номзоди, сиёсатчи Зоҳран Мамдани АҚШнинг энг йирик шаҳри бўлмиш Нью-Йорк мэри лавозимига сайланди. У шаҳар раҳбарлиги учун ўтказилган сайловда ишончли ғалабага эришди.
Дастлабки норасмий маълумотларга кўра, 4 ноябрь куни бўлиб ўтган сайловда Мамдани 50,35 фоиз овоз тўплаган. Қолган номзодлар — республикачи Кёртис Слива 7,14 фоиз, мустақил номзод, Нью-Йорк штати собиқ губернатори Эндрю Куомо эса 41,6 фоиз овозга эга бўлган.
34 ёшли Мамдани АҚШ президенти қўллаб-қувватлаган мустақил номзод Эндрю Куомо устидан ишончли ғалабага эришди. Мамдани Нью Йорк мери лавозимида ишлайдиган биринчи мусулмон ва энг ёш мер бўлади. Сайловолди кампанияси давомида у уй-жой ижараси, шунингдек, бепул автобуслар ва болаларни парваришлаш хизматлари нархининг ошишини назорат қилишга ваъда берган.
Дональд Трамп 3 ноябрь кунги баёнотида агар Зуҳран Мамдами мер бўлса, Нью Йоркни молиялаштиришни қисқартириш билан таҳдид қилганди. У ўз тарафдорларини мустақил номзод Эндрю Куомога овоз беришга чақирган. Овоз бериш 4 ноябрь куни бўлиб ўтди. Натижаларга кўра, Мамдани Куомо ва Республикачилар партиясидан номзод Кёртис Сливани ортда қолдирди. Мамдани унинг рақибини Трамп қўллаб-қувватлашини танқид қилди.
“MAGA ҳаракатининг (“Американи яна буюк қил” маъносида) Эндрю Куомони қўллаб-қувватлаши Дональд Трамп уни ўзи учун энг яхши мер деб билишини кўрсатади. Улар бир хил ҳомийлар, бир хил тор дунёқараш ва бир хил жазосизлик ҳиссиётига эга”, деган эди Мамдани.
Нью Йорк Ҳисоб палатаси маълумотларига кўра, мегаполис оладиган федерал маблағлар тахминан 7,4 миллиард долларни ташкил этади. Бу шаҳар бюджетининг 6,4 фоизига тенг. Трамп иккинчи президентлик муддати давомида бир неча бор сиёсий сабабларга кўра турли дастурларни федерал молиялаштиришни тўхтатиб қўйиш билан таҳдид қилган.
